Хүний арьсны төрлүүд ямар байдаг вэ? Генийн шинж чанартай болон гадны нөлөөллийн өөрчлөлтөөс хамааран энгийн, тослог, хуурай, холимог мөн эмзэг гэсэн үндсэн  таван төрлийн арьс байдаг.
Та харин өөрийн арьсны төрлөө мэдэх үү? Арьсны төрөлдөө таарсан бүтээгдэхүүн хэрэглэдэг үү?
Ихэнх хүмүүс өөрийн арьсны онцлогоо мэдэхгүйгээр дур мэдэн бүтээгдэхүүн сонгож хэрэглэдэг ба энэ нь арьс арчилгаанд гаргадаг хамгийн түгээмэл алдаануудын нэг бөгөөд арьсыг улам эмзэгшүүлэх аюултай. 

• Хуурай арьсны онцлог, хэрхэн арчлах хэрэгтэй вэ? 

Хуурай арьс нь чийгийн дутагдалтай арьсыг хэлэх ба арьс нь нимгэн, нүх сүв багатай, батга гарах нь ховор бөгөөд таталдаж, барзайсан мэдрэмж төрдөг бол хуурайшилтын эсрэг бүтээгдэхүүн хэрэглэх хэрэгтэй гэсэн үг юм. Хуурай арьс нь тослог бага ялгаруулдаг учраас чийгээр дутагддаг. Тиймээс, гүн чийгшүүлж, тослогийн хэмжээг тэнцвэртэй байдлаар хангах нь чухал. Мөн гадна талаасаа арьсаа арчлах хэдий ч дотроосоо ус сайн ууж, тэжээллэг хүнс хэрэглэх хэрэгтэй.

• Тослог арьсны онцлог, хэрхэн арчл+ах хэрэгтэй вэ? 

Тослог арьс нь батга ихээр гарч, үрэвсэх болзошгүй онцлогтой ба нүхжилт том, ил харагдахуйц байна. Тослог арьстай хүмүүс арьсандаа чийгшүүлэгч хэрэглэж болохгүй, улам тослог болно гэсэн буруу ойлголттой байдаг бөгөөд энэ нь харин ч эсрэгээрээ ба тослог арьсыг хуурайшуулж болохгүй, усан суурьтай чийгшүүлэгч хэрэглэж, чийгээ сайн нөхөх хэрэгтэй. Мөн цэвэрлэгээ маш чухал. Бохирдлыг сайн цэвэрлэж, нүх сүв бүрийг гүн цэвэрлэх нь үрэвсэхээс сэргийлдэг байна. 

• Эмзэг арьсны онцлог, хэрхэн арчлах хэрэгтэй вэ? 

Хүн бүрийн арьс өөр өөр онцлогтой байдаг. Төрөлхийн эмзэг, харшламтгай, эсвэл гадны нөлөөллөөс үүдсэн харшилтай байж болно. Энэ тохиолдлуудад тэрхүү онцлогтоо таарсан, харшлахгүй, эмзэгшүүлэхгүй бүтээгдэхүүнүүдийг сонгон хэрэглэх шаардлагатай. Байгалийн орц найрлагатай бүтээгдэхүүн хэрэглэж, харшилдаг зүйлсийг нүүрэндээ огт хүргэж болохгүй. Эмзэг арсыг мөн сайн цэвэрлэж, хамгаалах хэрэгтэй. Тиймээс сайн хамгаалах нарны тосыг байнга түрхэж, цэвэрлэгээг тогтмол хийж заншин, давхар чийгшүүлэхээ мартаж болохгүй. 

• Холимог арьсны онцлог, хэрхэн арчлах хэрэгтэй вэ? 

Тослог гэхээр зарим хэсгээрээ таталдаад, хуурай гэхээр дух хэсгээр тослогтоод байна уу? Тэгвэл энэ нь холимог арьсны шинж чанар юм. Ихэнх холимог арьстай хүмүүсийн Т хэсгээр тослог, бусад хэсгээр хуурайшилттай байдаг. Ингэснээр нүүрэндээ хоёр төрлийн бүтээгдэхүүн хэрэглэх ёстой гэж бодох хэрэггүй ээ. Зохих ёсны цэвэрлэгээг өдөр тутамдаа хийж, сайн чийгшүүлж, нарны тосоо түрхээд л байвал арьс үргэлжид эрүүл байх болно. Тослогтой хэсэгтээ шавран маск ойрхон давтамжтай тавьж, салфеткан чийгшүүлэх маскыг дараа нь тавих юм бол илүү үр дүнтэй байх болно шүү. 

Хүн бүрийн арьс өөр өөр онцлог, шинж чанартай байдаг ба хүмүүс өөрийн арьсыг тодорхойлж өөрт таарсан бүтээгдэхүүнийг сонгон хэрэглэх хэрэгтэй. Та өөрийн арьсны онцлогийг тодорхойлоход хэцүү санагдаж байвал доорх бичлэгийг үзээрэй.