Таны сошиал хуудсуудыг үзэхэд аялалд их дуртай харагддаг. Хэдэн орноор аялаж байсан бэ?

- Одоогоор 12 улсаар явсан.

Аяллын хамгийн сэтгэл татам зүйлийг нь юу гэж боддог вэ?

- Шинэ орчинд төөрөхгүй, нүх рүү орчихгүйн тулд жинхнээсээ нүдээ нээдэг, эргэн тойрноо жаахан хүүхэд шиг сониуч нүдээр хардаг нь хамгийн сайхан. Бид дасал болсон хотдоо юуг ч тоохгүй, мод нахиалж, навчис унаж байгааг ч анзааралгүй амьдарсан байдаг. Аяллын үеэр бол бүхнийг харж чаддаг.

Хамгийн гүн сэтгэгдэл үлдээсэн газар юу вэ?

- Африкийн Кени улс гайхамшигтай байсан. Бас хамгийн анх ганцаараа аялсан улс учраас Мьянмарт би их хайртай.

Корона дуусвал хамгийн түрүүнд хаашаа аялах вэ?

- Непал явж Эвэрэстийн суурь кэмпрүү алхалт хиймээр байна.

Аялах үед тулгарсан хөгтэй болон бэрхээштэй үеийн дурсамжаасаа хуваалцаач?

- Ганцаараа явахад илүү их адал явдалтай учирдаг шүү. Найзуудтайгаа, баг хамт олонтой явахад бүхнийг төлөвлөсөн байдаг учраас жаахан сонирхолгүй. Ганцаараа Вьетнамд явж байгаад картаа буруу газар уншуулж өглөө нь 0 дансны үлдэгдэлтэй сэрж үзсэн. Хөгтэй явдал бол Шанхайд ядраад замын хажууд түр амсхийж байсан чинь хүмүүс өрөвдөөд зоос шидээд байсан. Жигтэйхэн их санаа зовж билээ.